२०७५ जेठ ७ सोमबार 07:02:34

दसैँको अवधिमा साना सवारी दुर्घटना बढी : सबैभन्दा धेरै रूपन्देही र नवलपरासीमा

radio-saugat

बुटवल – चाडपर्वको समयमा हुने सवारी दुर्घटनामा यसवर्ष दसैँको समयमा केही कमी आएको देखिएको छ ।

पश्चिम क्षेत्रीय ट्राफिक प्रहरी कार्यालय बुटवलका अनुसार यसवर्षको दसैँ अवधिमा पश्चिमाञ्चलमा ३७ वटा सवारी साधन दुर्घटना भएकामा २३ जनाले ज्यान गुमाएका छन् । मृतकमध्ये अधिकांश दसैँ मनाउन यात्रामा थिए ।विगतका वर्षहरूको तुलनामा यसवर्ष ठूला सवारी साधनभन्दा अधिकांश साना सवारीको दुर्घटनामा धेरै क्षति भएको पाइएको छ । चाडपर्वका समयमा दसैँ मनाउन गन्तव्यमा पुग्न सार्वजनिक सवारी समयमा नपाउनाले आफ्नै साना सवारीमा यात्रा गर्नेहरू दुर्घटनामा परेको पाइएको छ ।

पश्चिम क्षेत्रीय ट्राफिक प्रहरी कार्यालय बुटवलका प्रहरी उपरीक्षक प्रकाश न्यौपानेका अनुसार ठूला सहरहरूका न्यून गतिमा चलाएका सवारी साधन खुल्ला राजमार्गमा पुग्दा उच्च गतिले चलाउँदा दुर्घटना बढेको बताउँछन् ।

पश्चिम क्षेत्रीय ट्राफिक कार्यालय बुटवलका अनुसार पश्चिमाञ्चलका १६ जिल्लामध्ये सबैभन्दा धेरै दुर्घटना रूपन्देही र नवलपरासीमा छन् । यी जिल्लामा १०/१० वटा दुर्घटना भए । सबैभन्दा धेरैको मृत्यु भने नवलपरासीमा भयो । उक्त जिल्लामा नौजना र रूपन्देहीमा छजनाको मृत्यु भयो ।

दुर्घटना भएका सबैभन्दा धेरै साधन मोटरसाइकल हुन् । रूपन्देहीमा आठ र नवलपरासीमा चारवटा मोटरसाइकल दुर्घटना भए ।

ट्राफिक प्रहरी कार्यालयको अघिल्लो वर्ष २०७२ को दसैँको अवधिमा भएका ३८ दुर्घटनामा २५ ले ज्यान गुमाएका थिए भने २०७१ सालको दसैँको अवधिमा यी दुवै वर्षको भन्दा दोब्बर ६१ वटा दुर्घटना भएका थिए । त्यसमा २९ जनाको ज्यान गएको क्षेत्रीय ट्राफिक कार्यालयको तथ्याङ्कले देखाएको छ ।

यस्तै यस वर्षको दसैँको १५ दिनभित्र भएका ३७ वटा दुर्घटनामा ८८ जना घाइते भए । तीमध्ये गम्भीर ५७ जनाको विभिन्न अस्पतालमा उपचार भइरहेको छ ।

दसैँको समयमा गन्तव्यमा समयमै पुग्न हतारो हुने र यातायात सञ्चालकले पनि जथाभावी यात्रु चढाउने, सवारीको क्षमताभन्दा बढी यात्रु राख्ने, हतारोका कारण सवारीको प्राविधिक अवस्था नजाच्नेजस्ता कारणले अत्यधिक दुर्घटना भएको पाइएको छ ।

यसका साथै साना सवारी चालकले लापर्बाही ढङ्गले सवारी चलाउने, मादक पदार्थ सेवन गरी सवारी हाँक्नेजस्ता कारण पनि दुर्घटनाका मुख्य कारण बनेका छन् ।

Copyright 2015 RADIO SALHESH 88.8 MHZ. All Right Reserved.